Provìntzias, nominados sos commissàrios

Subra proposta de s'assessore Cristiano Erriu, lunis sunt istados nominados sos commissàrios de sas Provìntias sardas, francu chi pro Tàtari, Nùgoro e Aristanis, chi ant a andare a iscadèntzia naturale in su pròssimu beranu, muntengènde sos òrganos elegidos in su 2010. Subra de chimbe nùmenes in essida b'est una cunfirma: pro sa Provìntzia de Terranoa-Tèmpiu restat Giovanni Carta.
A Tiziana Ledda, diretora generale de s'àrea legale de sa presidèntzia, andat imbetzes sa Provìntzia de su Mèdiu- Campidanu. Franco Sardi, diretore generale de s'assessoradu a su Bilàntziu, at a ghiare sa Provìntzia de Casteddu, mentres Maria Gabriella Mulas, dg de sos servìtzios idricos de sa presidèntzia, at a èssere pro como a capu de sa Provìntzia de s'Ogiastra. Chie est a sa ghia de sa Provìnzia de su Sulcis-Igresiente at a èssere Giorgio Sanna, diretore de s'Enas.