Imparare sos passos prus difìtziles de su ballu sardu no est mai istadu gasi interessante. Arrivat como unu mètodu nou impitadu dae su chircadore Salvatoràngelu Pisanu, publicadu dae sa domo de imprenta Edes cun su libru «Ballare in sardo, anatomia e geografia di un linguaggio coreutico». Su volùmene faghet parte de sos cuadernos de s'Istitutu Camillo Bellieni de Tàtari, e at a èssere presentadu gioja 18 de nadale a Mecumere, in sa Biblioteca comunale de carrera Ariosto 2.
A introduire sas fainas de sa cunferèntzia, a pustis de sos saludos istitutzionales, at a èssere Daniela Masia, esperta de limba e cultura sarda. Ant a sighire sos interventos de Micheli Pinna, diretore iscientìficu de de s'Istitutu Bellieni e autore de sa prefatzione, de Elena Bertuzzi, antropòloga de su Paris Ouest-Nantes La Defènse, chi at frunidu su personale contributu sou in saredatzione de su libru, e galu de Gian Nicola Spanu de su Conservatòriu de Tàtari, chi nd'at curadu sa presentada. E in finitia, at a èssere presente s'autore matessi. S'addòbiu est ammaniadu dae s'Ufìtziu limba sarda cun su patrotzìniu de s'amministratzione comunale de Macumere. Sa chirca de Pisanu est innovativa proite impreat una metodologia noa de rilevamentu fundada subra critèrios de sa «Cinetografia Laban», de sa cale est puntu de riferimentu internatzionale sa professoressa Bertuzzi. Semus in antis a una "grammàtica" de su ballu, chi partit dae sos elementos mìnimos finas a arrivare a sas fases prus cumplessas. In youtube sunt garrigados sos filmados de riferimentu a sas trascritziones presentes in su testu. Bastat de iscrìere sas paràulas-crae in su computer.
"Progetu realizadu cun sa partetzipatzione de sa Regione Autonoma de Sardigna - L.R. 26/97 subra sa limba e sa cultura sarda"