Comente si podet reagire a s'iscumparta de giornales e televisiones in Sardigna? Si nd'est faeddadu istasero in s'Àula magna de s'Universidade de Tàtari, in su cunvegnu "Informatzione, sovranità e libertà", in ue s'est tratadu finas de giornalismu in limba sarda. A s'addobiu ant partetzipadu sos relatores Romano Cannas, giai diretore de sa Rai regionale, Franco Era, avocadu e cussigeri comunale de Tàtari, Daniela Scano, vitze presidente Assostampa e Bartolomeo Porcheddu, editore in limba.
Sa dibata est istada coordinada dae Marco Sanna, giornalista de "5stelle tv", litzentziadu de reghente.
A serrare sas fainas est istadu Frantziscu Sedda, semiòlogu, segretàriu natzionale de su "Partito dei sardi".Dae s'interventu de Daniela Scanu est bessida a pitzu una situatzione lastimosa pro totu su setore, chi in pagos annos at bidu unu calu de su 40 pro chentu de sos giornalistas contratualizados, emitentes serradas, mentres s'informatzione web no at in pràtica criadu posto de traballu istàbiles.
Finas Romano Cannas at ammìtidu chi, mancari esseret istadu bene cussiente de sas dificurtades, mai aiat àpidu pensadu chi sa cosa fiat grave a tale puntu.
Pro Franco Era, chi est su primu firmatàriu de una delibera subra sa tutela de s'informatzione locale, aprovadu a s'unanimidade dae su Cossìgiu comunale tataresu, si diat dèvere istituire unu osservatòriu istàbile pro monitorare sa crèschida lestra de totu su compartu, e diat dèvere èssere pensada un'Agentzia de s'informatzione comente òrganu de coordinamentu de sas atividades de sas testadas locales. Intro s'Agentzia, si diat dèvere chircare una figura capatze de agatare risorsas in sos programmas de finantziamentu europeos.
A pustis de unu primu atacu a sa polìtica, acusada de indiferèntzia,est istadu naradu chi, prima de criticare su disinteresse de sos polìticos, tocat de s'abbaidare in cara pro cumprèndere cale sunt sos problemas, e tando fàghere propostas de solutzione a sa polìtica. Petzi gasi sos guvernantes diant àere unu indiritzu pro pòdere interbènnere. Custu cunvènniu est de tzertu unu puntu de partèntzia, dadu chi sos prepostos a s'informatzione, est a nàrrere sos giornalistas, sunt cussos chi si òcupant de fàghere connòschere sas crisis de sos àteros setores, ma sa issoro restat cuada. Naradu diversamente: su giornalismu si òcupat de sas notìtzias, ma non fàghet notìtzia.
Meda sos intebentos chi ant sighidu sa dibata. Ant faeddadu Màssimo Sechi, ex Antenna1, Alessandro Pinna, chi dirigit su "Corriere Turritano", Ottavio Sanna, coordinadore de su territòriu pro su Partito dei Sardi, Frantzisca Frigau pro Sardigna Natzione e àteros. Finas su sutaiscritu s'est permìtidu de ammentare chi esistit una lege natzionale, sa 150 de su 2000, chi no est mai istada aplicada. Est una lege pensada pro sos entes pùblicos, pro fàghere a manera chi sos matessi s'esserant dotados de gente cumpetente pro sos ufìtzios issoro de "addetto stampa". Una normativa chi, si esserat istada aplicada comente si tocat, aiat pòtidu dare unu pagu de respiru a chie in sa categoria est sufrende sa crisi prus de totu e, a su matessi tempus, fiant istadas valorizadas realtades chi finas a como non resessint a àere boghe.
"Progetu realizadu cun sa partetzipatzione de sa Regione Autonoma de Sardigna - L.R. 26/97 subra sa limba e sa cultura sarda"